សៀមរាប​៖ គយ​ច្រកទ្វារ អាកាសយានដ្ឋាន អន្តរជាតិ​សៀមរាប បាន​ឃាត់ខ្លួន​ជនសង្ស័យ​២​នាក់ ខណៈ​នាំចូល​ទូរស័ព្ទ iPhone ​គេច​ពន្ធ​ចំនួន ៤៩៧​គ្រឿង នៅវេលា​ម៉ោង​៩​និង​៣០​នាទី ថ្ងៃទី​១៤ ខែ​មករា ឆ្នាំ​២០១៦​។​

​ជនសង្ស័យ​ដែល​នាំចូល​ស្មា​ត​ហ្វូន គេច​ពន្ធ​នេះ មានឈ្មោះ ភិន រស្មី និង ង៉ូវ ធៀង​ហុង ពួកគេ​បាន​នាំចូល ទូរស័ព្ទ iPhone ចំនួន​៤៤៧​គ្រឿង​ តាម​ច្រកទ្វារ​អន្តរជាតិ អាកាសយានដ្ឋាន​សៀមរាប​។ ទូរស័ព្ទ​ស្មា​ត​ហ្វូន ដែល​គេចពន្ធ​នោះ មាន iPhone 6s Plus​ថ្មី ចំនួន ១៥​គ្រឿង​, iPhone 6s​ថ្មី​ចំនួន ៣២​គ្រឿង​, iPhone 6s Plus ប្រើ​រួច ៨៥​គ្រឿង និង iPhone 6s ប្រើ​រួច ២១៥​គ្រឿង​។​

​សមត្ថកិច្ច​បាន​ប្រាប់ឲ្យដឹង​ថា ទូរស័ព្ទ​ស្មា​ត​ហ្វូន ដែល​គេចពន្ធ ត្រូវ​បាន​ជនសង្ស័យ​ផ្ញើ​តាម​យន្តហោះ​ដោយ​ឈ្មោះ ភិន រស្មី ចំនួន​៧ វ៉ា​លី និង​ឈ្មោះ ង៉ូវ ធៀង​ហុង​ចំនួន ៤​វ៉ា​លី​។​

​សមត្ថកិច្ច​បាន​បន្តថា នៅ​ម៉ោង ១០៖២០​នាទី ព្រឹក​ថ្ងៃ​ទី​១៤ ខែ​មករា សមត្ថកិច្ច​បាន​ចាប់​ដកហូត ០១​វ៉ា​លី​ថែម​ទៀត ដែល​ឈ្មោះ ភិន រស្មី បាន​ផ្ញើ​តាម ជើង​ហោះ​យន្តហោះ​មួយទៀត​ដោយ​រួមមាន iPhone 6s​ថ្មី ៣០​គ្រឿង និង iPhone 6s Plus ថ្មី ២០​គ្រឿង​។​

​តាម​ប្រភព​ព័ត៌មាន​បាន​អោយដឹង​ថា​ទូរស័ព្ទ​ស្មា​ត​ហ្វូន​ទាំងនេះ​ត្រូវបាន​នាំ​ចូល​មក​ពី​ពី​ក្រុង​ហុងកុង និង​ប្រទេស​សិង្ហ​បុរី​៕

ប្រភព ៖ rasmeinews